Времето на Марко Цепенков допрва доаѓа, вели директорот на Институтот за фолклор, Ермис Лафазановски. Тој смета дека дури во овој 21 век ќе се види полното значење на овој непроценлив собирач на народно творештво, бидејќи оваа и следните генерации фолклористи и научници многу подлабоко ќе навлезат во толкување на собраниот материјал. Во современието, таков профил е струмичанецот Иван Котев, кој има неколку десетици илјади единици фолклорен материјал. Сепак, тој е ретка појава во македонската фолклористика, бидејќи освен што го собира и го проучува фолклорот.
Точно е дека двете работи многу тешко можат да се спојат и Иван Котев е еден од тие коишто успешно успева и научно да ги проучува фолклорните материјали што ги собира. Проф. д-р Ермис Лафазановски-директор на Институт за фолклор „Марко Цепенков“ Скопје

За фолклористичкото дело, а особено проучувањата на неговиот труд неодамна се објави Монографијата „Иван Котев – меѓу фолклорот и животот“. Приредувач е Ана Витанова – Рингачева, која смета дека собраните материјали на Котев, пак, допрва треба да се објавуваат и проучуваат во различни научни области и за различни цели.

Тоа ви е конзервиран јазик. Веќе изумреа старите коишто знаеја да го говорат тој дијалект, особено по селата. Ама, приказната не умира. Таа останува бидејќи некој ја запишал и ни ја оставил во аманет. Ова е времеплов и на јазикот. Проф. д-р Ана Витанова Рингачева
Котев е длабоко навлезен во деветтата деценија од животот, но неуморно работи на дешифрирање на она што го собрал во полувековната собирачка дејност. Во моментов работи на три книги, а за струмичкиот регион вели дека е плодна почва за собирачка и фолклористичка работа.

Струмичкиот регион има уште многу за работа, ова е само почеток. Овој регион изобилува со фолкор од сите видови, приказни, песни, кажувања, легенди, спортски игри. Тоа е едно вистинско богатство, но не може само еден човек да го собере. Иван Котев – фолклорист
Досега, Иван Котев има објавено 15 книги со народни умотворби.
Фотографии од промоцијата на Монографијата „Иван Котев – меѓу фолклорот и животот“
Извор на фотографии: Радио СтрумицаНет





